ភ្នំពេញ ៖ ក្រសួងសុខាភិបាល សម្រេចឲ្យបញ្ជូនអ្នកជំងឺ កូវីដ-១៩ ចំនួន ២នាក់ មិនទាន់ជា សះស្បើយ ឲ្យមកបន្តការព្យាបាល នៅមន្ទីរពេទ្យមិត្តភាព ខ្មែរ-សូវៀត ក្នុងរាជធានីភ្នំពេញ បន្ទាប់ពីពួកគាត់ ព្យាបាលនៅមន្ទីរពេទ្យខេត្ត មិនមានភាពធូរស្រាល។

អ្នកជំងឺទាំង២នោះ ជាជនជាតិខ្មែរ រស់នៅខេត្តកំពង់ឆ្នាំង និងរស់នៅខេត្តបន្ទាយមានជ័យ។ហើយរហូតដល់ពេលនេះ កម្ពុជារក្សាចំនួនអ្នកឆ្លងជំងឺ កូវីដ-១៩ ចំនួន ១២២នាក់ ហើយមានអ្នកព្យាបាលជាសះស្បើយ ចំនួន ១២០នាក់។

លោកស្រី ឱ វណ្ណឌីន រដ្ឋលេខាធិការ និងជា អ្នកនាំពាក្យ ក្រសួងសុខាភិបាល បានលើកឡើង ក្នុងគ្រុបតេឡេក្រាម ក្រុមអ្នកសារព័ត៌មាន នៅថ្ងៃទី៨ ខែឧសភា ឆ្នាំ២០២០ ថា «មិនធ្ងន់ទេ  តាមសភាពទូទៅរបស់អ្នកជំងឺ តែវីរុសនៅមានក្នុងខ្លួនគាត់នៅឡើយ។ថ្ងៃនេះ  ក្រសួង បាន សម្រេចឲ្យបញ្ជូនមកបន្តការព្យាបាលនៅមន្ទីរពេទ្យមិត្តភាពខ្មែរ-សូវៀត ទាំង២នាក់ ហើយ»។

លោកស្រី រៀបរាប់ថា វីរុសនេះ ពិបាកនឹងដឹងណាស់  ដោយសារអ្នកទាំង២ ម្នាក់ជាបុរសវ័យ៧៥ឆ្នាំ  មានបញ្ហាសុខភាពប្រចាំកាយ  និងម្នាក់ទៀតជាស្ត្រីវ័យ៣៦ឆ្នាំ  មានបញ្ហាប៉ះពាល់ផ្លូវចិត្ត  តម្រូវឲ្យមានការពិនិត្យព្យាបាលនៅមន្ទីរពេទ្យថ្នាក់ជាតិបន្តទៀត។

លោកស្រីបន្ដថា « ជូនពរពួកគាត់ឲ្យបានឆាប់ជាសះស្បើយ ពេលមកដល់មន្ទីរពេទ្យមិត្តភាព ខ្មែរ-សូវៀត។  ដូច្នេះហើយ  សូមបងប្អូនប្រជាពលរដ្ឋ  លោកបន្តការប្រុងប្រយ័ត្ន ការពារ ការ ចម្លង នៃវីរុសកូវីដ-១៩  នេះជាចាំបាច់  ត្រូវចងចាំថា យើងអាចភ្លេចវីរុស កូវីដ-១៩  តែវីរុសកូវីដ-១៩  មិនដែលភ្លេចយើងទេ»។

យោងតាមសេចក្ដីជូនដំណឹងរបស់ ក្រសួងសុខាភិបាល ចេញផ្សាយនៅថ្ងៃទី៨ ខែឧសភា ឆ្នាំ២០២០ ថា ក្រសួងសុខាភិបាលកម្ពុជា បញ្ជាក់ថា មិនមានករណីព្យាបាលជាសះស្បើយ និងមិនមានករណីវិជ្ជមាន កូវីដ-១៩ ថ្មី នៅថ្ងៃទី៧ ឧសភា៕ E B